D'Möötter hed is verzelld, äs siigi en Alp gsiin; aber Jaar für Jaar siige d'Älper drüüf dännä chun; neemmen häigi gwissd wee, und döö häigi da neemmem mee welle z'Alp gaan.

Döö ischd äina chun; Hans Cheeschwanz hed er ghäissen und hed gsäid, är waagi's; är siigi nid e Firchthas; är welli z'Alp.

Är ischd z'Alp gfaaren, und alls ischd gööd ggangen; aber wan er am Aben ischd in dr Näschterre glägen, ischd e schwarza Ma chun, hed nid ds Müül üüftaan und ischd näb in ge-l-ligen. Jischzapfechalta ischd er gsiin, und Hans Cheeschwanz ischd gäge d'Wand grickd und dr ander im naa, bis Hans nimmä hed chenne fleen ung ganz an dr Wand an ischd gsiin.

Döö ischd entli dem Schwarze ds Müül üüfggangen und hed gsäid, är selli chun. Hans ischd mid im, und dr Schwarz hed e Straalhowwen und e Schüüfle gnun, und döö hed er bifolen, är selli in arra Hitteschrooten afan graben. Aber Hans hed si gwidreged und hed gsäid: „I han da niid z'graben." Döö hed dr Schwarz afan graben, bis er uf ener Blatten ischd gsiin. „Lifd dee embrüüf", hed er gsäid. Aber Hans hed vernäited ung gsäid: „I han dee nid abhitaan; i han da niid üüfazliften." Döö isch dr Schwarz ellenggen hinder sa har und hed bbiischted ung gchnorzed, bis er sa hed hobe ghäben. Under dr Blatten ischd es Chessi volls Gäld virhachun.

„Lift das embrüüf“, machd dr Schwarz enumhi. Aber Hans hed Bschäid ggä-w-wee geng: I han da niid abhitaan; i han da niid üüfazliften.“ Döö hed dr Schwarz d’Heenen ergriffen und ds Chessi üüfataan. Derna hed er ds Gäld zertaan und afan drii Hiifem machen. „So, jetze siin da drii Hiifen; äina ischd fir di; nimm de-r-rächten, suscht zerschriissen di z'tüüsig Bitzen und Fätzen", hed dr Schwarz drewwd und derzöö d'Oige verdräid wee ne toibe Muni. Aber Hans hed täichd: Firchd der niid, sa gscheed der niid und chächa gsäid: „Ee, sa nimen i grad all drii!" Bloss hed er's zum Müül üüsglaan, ischd dr schwarz Man neena mee da gsiin.

Hans Cheeschwanz hed dee drii Hiife bhärded und ischd vun da an e-r-riicha Ma gsiin.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.