Löög, hie uber Wiisseflöö, wee dr Waald embrinha hanged, da dri siigi es Wiib, d'Harzerren, eso hed äim's Dratt und d'Möötter aggän, und wem mer bim Sträällen nid häi-w-wellen darhan, sa hed's ghäissen: „Wart nummen; d'Harzerre chunnd den und strääld di mid dem iisige Strääl."

Hereera, was hed iis ds Groosi vun dr Harzerre bbrichted! Si hed is welle pliiggen; aber äimmel i han numme Churzwiil ghäben, we si vun arra hed afa zellen.

Da siigi es Mäitli gsiin; das häigi bim Sträällen gmööled, und d'Möötter häige-m-ma wellen us em Chaschtli in dr Loiben Haselnuss räichen und's eso gschwäiggen. Aber wa si ischd us dr Loibe chun, egghäis Mäitelli neena mee da!

Derwiilen ischd d'Harzerre chu gsiin und hed das Mäitelli i- w-Waald verzigled in und en Hili taan. Mid enem Chööstrigel hed s' es gsträäld und mid arra Riisbirschte gwäschen; da hed 's döö ghäben fir ds Uwwatlitöön und ds Hoorne, fir niid uw wider niid.

Und ds Mäitelli wän gäären häin und hed Lengiziiti ghäben. Aber d'Harzerre hed 's bhäben und nid welle-l-laan gaan. Döö isch schi äis Tags furt; ds Mäitelli hed dän Oigemblick erlickd, ischd us dr Hili gschossen und abgschoben und häin und zer Möötter!

Vun da an ischd das Mäitelli loibs gsiin, und we 's d'Möötter bim Sträällen doch no es Bitzi Bitzi ghaared hed, hed's nee mee afan huwwlen und räären und dr Möötter nee mee Verdrissigs anha gmachd.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.