Im Winter hed em Brienser im Goww ghirted. Wiit um bräit ischd er ellengge gsiin. Döe ischd äis es Tags vun dr Oltschiburg abha es Zwäärgli chun. Das hed im gbolfen bim Hirten, hed Holz i ds Chuchelli träägen, dem Mischt us em Gade taan ung gchääsled. Wäred der Nacht isch'sch bbliben und näb em Hirter in dr Chämmete glägen. Dr Hirter ischd mengsmal embrin gem Briens, uw wen er ischd umhi chun, hed dem Vee niid gmangled und d' Mutschleni sii graatni uf em Chääsbäichli glägen.

Äis ischd dr Hirter umhi häin. Jwwäreddäm ischd dr Feen inhagbiid. Etli menga Tag ischd er ggangen. Um Gwätt um hed er pfiffen; gchittelled hed er wie sälten; a d'Tirenen hed er gring- gelled; Decher hed er drewwd furtzträägen, und de-l-Liiten hed er ds Ghidel fascht vum Liib gschrissen.

Wan er hed laan gaan, ischd dr Hirter umhi gäge ds Goww. Aber ditzmal hed's gfääld. Scho vu-w-wiitem hed er ds Vee gheerrem möelen. Im Gaden isch'sch i d'Chetteni glägen und hed bbrieled, äis uber ds ander üüs. Gläitig hed er ma z'frässen und z'budle ggän. Döe ischd er i d'Dili, fir gen Heww abzschrooten. Etz ischd ds Zwäärgli us em Heww chu virhazschnaaggen, und dr Hirter ischd im grobhelzig chun. Aber ds Zwäärgli heed üüsgseen wie ne verschmurreta Epfel im Üüstagen; Bäindleni und Ärmelleni hed's ghäben wie Stäckleni; ganz üüstrochnets isch'sch gsiin und hed langsam virhabroosmed, äs hätti scho-w-wellen hirten; aber döe siigi döe drum dr Urwätter chun.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.