Der Grossätti het emol verzellt: Der wüsset doch, wo s`Lyrum isch, dört halbwägs Weislige, wo d`Stross fascht e-n-Egge macht, bim Chüehbirbaum. Jo, also dört isch mer einischt öppis passiert, i dänke miner Läbtig dra. I bi go öle uf Magde-n-abe. Der Chilchmeyer het mer der Chohli ge, ass i d`Nusschärne und der Lewat nit ha müese träge; `s Güfiwägeli ha-n-i gno. Es isch alls guet gange, d`Frau isch no mit cho, umme isch`s e chly spot worde; es isch scho Nacht gsi, womer z`Weislige usem Rössli cho sy, womer no ne Schoppe gno hei. Aber der Wäg hät i jo wölle finde mit verbundene Auge. Womer ebe do zum Chüehbirbaum cho sy, lauft e Ma vor is ane und i dänke: So, jetz fahrsch eifacht däm noh, dä goht auf uf Oltige und i ha `s Ross lo trampe. Z`letschtemänd seit aber d`Frau: «Das goht au lang, bis me d`Liechter gseht vo Oltige! » Mir het`s au wölle sy und i ha der Chopf e chly gstreckt, aber alsfurt isch keis Liechtli erschiene, es isch mer echly unheimlig worde-n-und i bi ab, ha umenandergluegt. Es isch niene kei Ma meh gsi und aber au kei Wäg meh. Der Chohli het jetz au d’Ohre gstellt, as we wenn`s nit ganz ghür wer, i ha-n-en müese füehre. Ändlig gseh-n-i doch es Liecht, wyt ewägg; es isch vom Rumpel gsi und ganz amene andere-n-Ort sy mer z’letscht doch is Dorf cho und es het is gwohlet, eus und im Chohli.

Quelle: G. Müller/P. Suter, Sagen aus Baselland, Liestal 1939.

Eingelesen von der Mutabor Märchenstiftung, www.maerchenstiftung.ch