Es Meitelli und es Buebelli hei zem Groosi z'Dorf wellen. Wa s'siin bim Gartetirli gsiin, ischd em Bär chon und heb bbrummled: „Wa gääd ier hin?"

„Zum Groosi," hed ds Buebelli gseid.

Due hed dr Bär gfräägd: „Was git's ech den?"

„Nuss um Bbiri," hed ds Buebelli gseid.

„Gäd mier den o," hed dr Bär bbrummled, „old i frissen ech den!"

Etz hei s' enandre d'Hendelleni ggän und siin, was gischd, was heschd, zem Groosi gliffen und hein afam muelen. Bim Groosi sii si über d'Stägen uf und zer Chuchistir inhi und hein ds under Tirli dem Bär vor dr Nase zuegrierrd. Där ischd nen naa und hed sa grad welle frässen.

Aber dr Groosatt ischd i d'Louben ge ds Gweer reichen und hed dem Bär i ds Fidla gschossen.

Due ischd dr Bär unnefir zer Gotten und hed gjaammerred: „O, tuem mier mis Fidelli verbinden. O, tuem mier mis Fidelli verbinden." Aber d' Gotten hed ma e Pfanne volli heisses Wasser agschmeizd und nen mit dem Bäsen über d'Stägen abgjagd.

Und due ischd dr Bär furt und i ds Schwanderbärgli ge verdärben.

Melchior Sooder:   Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.