's chunt mär jetz au z'sinn, wie nä mol ä paar mannä z'sämä g'standa sigä und sigä go Gält grabä zuäm Salibrunnä usä. mä sait, äs sig dört ietz no ä ganzä Trog voll im Bodä-n in und no Schuflä und Chärst därbi. Si häigä's aber nit äläi chönnä; der Pfarrer, i glaub, der Bürgi seelig, häig enä g'hulfä, nämli nit grabä, abär sust, und er häig gsait, er wöll nüt därvo, wenn si's scho übärchömtit. Si häigä grabä, bis si de ganz Trog voll scho dussä gha häigä, si häiga aber nüt z'sämä dörfä sägä. Wo n'er scho frei und frank do gstandä sig, de Trog, luäg einä von änä vorus und gsäii eine cho z'ritä uf äme wissä Schimmäl. Er häig gmaint, äs sig der Pfarrer, denn dä sig fast alläwil uf äme Schimmäl g'rittä, er häit halt gar bös Füäss gha, dä her, wegä sim Zipperli. Dä, wo do cho sig, häig aber änanderno grüäft: „I will's halb, i will's halb!“ Jetz säg dä, wo-nä g'seh häig cho: „G'sehsch dört, er chunt scho, de Sakermentspaff, und will's halb, und hät jo nüt dra tho. Wenn-ä nummä s'Donnerwättär verschuss!“ Und wie dä das g'sait häig, de sig 's G'schirr und der Trog wiedär is loch iä g'heit und si häig' es nümmä chönnä neh, und au de Pfarrer sig mit samt 'm Schimmäl do z'mole dähaim gsî. Und s'Gält und 's Gschirr und de Trog ist itz no dört. Wemmer nummä wüsstä, wo's wär, mer wöttit es go räichä! Sellä Ma ist au scho g'storbä ass ammä der Blätz bi drei Schuehnä he wöllä zeigä.

Quelle: Ernst L. Rochholz, Schweizer Sagen aus dem Aargau, Band 1 Aarau, 1856

Eingelesen von der Mutabor Märchenstiftung auf www.maerchenstiftung.ch