Dr Pfarer versumt d’Predig

I bsinne mi grad eso blösseli z’rugg, wo d’Pfarer au ame Friti hei müesse predige. Do isch vom Pfarer z'Rohrbech ’s Gred gange, är göih am Friti nid go predige; scho vor Tag göih er drus u go jage.

Du sig bim Landvogt gchlagt worde. Dä heig amene Friti mehreri Ross lo aspanne u sig uf Rohrbech. Wo dr Pfarer sig, frog er d’Pfareri‚ är wöll z'Predig. Die sig schön i d’Sätz cho u heig em Sigerischt gseit, är söll de rächt lang lüte u mit allne Glogge.

Dr Pfarer sig uf dr Hohwacht hinger emene Has gsi; du lüti’s mit allne Glogge. Jetz heig er gmerkt, dass’s fähli u sig gäge hei. D’Pfareri heig ihm dr Chanzelrock etgäge brocht; gschwing, dr Landvogt sig do, süsch wärd er abgheit.

U dr Pfarer sig uf e Chanzel. Für e Tägscht heig er gha: „Wenn der Hausher wüsste, zu welcher Stunde där Dieb käme, so wachete är und liesse nicht in sein Haus brächen.“

Wo d’Predig sig verbi gsi, heig dr Landvogt gseit, das heig er brav gmacht: hingäge für ne Schelme söll er ne de fürderhi nid tituliere, u jetz söll er Predig ha ame Friti, wie’s bifohle sig; für das Mal well er ihm's schänke; aber är söll einewäg dra dänke.

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.