Vo Negel‚ Rossise u Böhnli

a) E Ma het z‘Ustagen am Chaserebärg es Acherli gstruchet un isch i Wald ihe, go z'Obe näh. Du het er am Boden es Hüfli roschtegi Negel gseh ligge u die, wo's ne düecht het, mi chönnt se no bruche, het er ufgha un i Sack gstosse.

Deheime het’s ne düecht, es chlingeli so arig im Sack inne. Är luegt, was es sig u het Guldstücki, eis nom angere, so viel wie-n-er Negel het gfunge gha, us em Sack chönne vürenäh. Er het drum no e chli Brotbrösmeli im Sack gha, wo-n-er d’Negel het drito.

b) Am Chaserebärg het dr Danijoggi mit sim Liseli Härdöpfel gsetzt; das isch no e chline Strupf gsi. Nomene Rung isch däm d’Arbeit verleidet. Äs isch i Wald ihe go gvätterle. Du het es am Boden e Hufe Negel gseh ligge un e paar het’s ufgha un i s'Scheubeli to. Derno isch es zum Vater gange. Äs het ihm welle zeige, was es gfunge heig. Du glitzeren uf em Händli luter lötegi Guldstücki. Aber im Wald inne hei sie e ke einzige Nagel meh gfunge.

c) Es Fraueli het im Schlosswäldli gholzet. Am Bode sin e Hufe Negel gläge. Aber äs het si witer nid gachtet u se lo ligge. Deheime het ihm öpper gseit, äs hatt söllen es offes Mässer dri schiesse, de wäri die Negel Guld worde.

d) Bi dr Altburg het e Bueb es Rossise gseh ligge. Hätt er's gno, wär es Guld worde. Deheime het er’s gseit. Du si alli i d’Altburg u hei gsuecht u gsuecht, aber niene nüt meh gfunge.

c) Einisch si Hansüelshanneses Joggi dür ne Wald glüffe. Näbem Wäg sige Böhnli gläge, wie verzatteret, hie es Hüfli, dert eis, do umen es paar u gli druf wieder es Hüfli. „Eh, das si jetz rächt schöni Böhnli“, heig er dänkt u öppe zweu Hüfli zsämeto u i Sack gstosse. Deheime heig er se zeigt; du sige Guldstücki vürecho. „E, hätt se jetz au alli gno“, säg er u sig wiederumen i Wald, aber heig e kes einzigs Böhnli meh gfunge.

M. Sooder, Sagen aus Rohrbach, Huttwil 1929

 

Eingelesen von der Mutabor Märchenstiftung auf www.maerchenstiftung.ch.