Dr Süffibalzi häig vor'm-anä äisstig pättet, wo-nn-er gstandä-n- und ggangä syg. Aber äinisch syg-s'm doch nimmä rächt gsy. Das syg z'Ziri unnä gsy. Da häig'r miässä mid-ämä Gschäftsma gah und der syg am Abed mid'm in-nes Wirtshüs ga ubernachtä, und da häiget-se-s in-ni Chammer üfä gwisä. Und d'rnah, wo-sy i diä Chammer üfä chu syget, häig d'r Süffibalzi gseh, dass diä vollä Blüet syg. Und düe häig är wider wellä-n-üsä, aber d'r Gschäftsma häig gsäit, är sell nur ä käi Angst ha, är sell nur rüewig i ds Bett. Und sy syget i ds Bett. Um Mitternacht häiget-s zwee gmerkt chu z'tyssälädä-n-uber d'Stägä-n-üfä und a d'r Tirä rigglä. »Rüewig!« häig der Gschäftsma nur griäft, und da syg's wider ganz stillä gsy. Am Morged, wo sy üsä syget, syget doch zwee gstandä vor d'r Tirä-n- und häiget hindärä-glitzt gha und zwäi grysslichi, langi, langi Mässer i dä Händä, aber häiget-si nitt chennä verrodä. Sy syget fort. Am drittä Tagg häig d'r Gschäftsma zum Balzi gsäit, jetz well'r doch lüegä, wass diä zwee machet, und häig ä Spiägel virägnu und häig dri glüegt. Die zwee syget nu vor d'r Tirä gstandä-n- und häiget d'Mässer nu üff-zogni gha, brezys wiä am sälbä Morged. Aber losglah häig-er-s düe. »Diä mached-is nymeh«, häig'r gmäint.

Peter Ant. Gamma, 50 Jahre alt, Alpknecht, Göscheneralp

Quelle: Müller, Josef: Sagen aus Uri 1-3. Bd. 1-2 ed. Hanns Bächtold-Stäubli; Bd. 3 ed. Robert Wildhaber. Basel: G. Krebs, 1926, 1929, 1945

Eingelesen von der Mutabor Märchenstiftung auf www.maerchenstiftung.ch.