Es ist emol en Ma — es thuet em jezig kein Zah meh weh — zum e riche Bur cho und hät em sin ganze Staal voll Söu abgchauft , jo Prachtstück sind's gsi. Aber nid vergäbis. En ganze Hufe Föufliber hät er defür müese füremache.

Nu, er isch's nid gröuig gsi, bis er mit dene mordsebigfeiße Söune dorfshalbe tribt und si do grad vor em Dorf zue wott über de Stäg schöucke gus! gus!

Aber jo, wie ist do de Ma verschrocke ! Schlegel a Wegge sind si Söu in Bach abe trohlet eini hinder der andere dri; und wo de Ma abe lueget, so sind's — de Gugger soll di hole, wänn's nid wohr ist — luter Strauwäle gsi und sind de Bach ab gschosse häsch mer's niene gseh!

Zersten ist de Ma halt schüli verlotteret; aber es ist kei Stund gange, so seid er zuen em selber: „Hol's der Daniel, de Bur mueß mer ane ha!" Goht starregangs won er härcho ist und trifft zerst d'Büri a, wo grad i der Chuchi Härdöpfel präglet hät zum Imbiß, und surret ase wild anere verbi. Won er i d'Stuben ie chunnt, de lit de Bur de lange Wäg über der Ofen ie und schloft und schnarchlet wie en Chabisschnider.

De Ma futteret und regiert, daß d'Schwarte hettid möge chrache; aber de Bur rodt si nid und thuet wie wann er weit ewig verschnufe. Uf das wird de Ma erst fuchswild;, er nimmt de Bur am Bei und wott en ab em Ofen abe zehre, do loht bigostlig s'Bei und blibt em i der Hand wie en uszehrts Söuschwänzli. Tusig Gottswille, wie hät de Ma si zapft! Gsprungen ist er und gsprunge was gisch was häsch, und hät nümmen ume glueget, bis er diheim gsi ist. Ja es hät lämig öppedie no e Nase gha, e rachtschaffeni Sou und — en pfiffige Bur z'verwütsche.

Quelle: Sutermeister, Otto: Kinder- und Hausmärchen aus der Schweiz

Luzern und Zürich. (Mundartlich nach Lütolf Sagen S. 242.)

Eingelesen von der Mutabor Märchenstiftung auf www.maerchenstiftung.ch.