Im Stalduried heimu oich a mal an g'wissi jungi Wibsperso far a Hex g'häbet, di d's Veh verzäubrot hei. Eini van da hei a schöni frischkalbjoti Chuo mit am schönu Uter g'häbet. Wie nuh (nun) diz Wib mit discher Chuo, über du Platz g'fahrun ist, hätsch z'ihra selber g'seit: «We doch d'Hex nit abba umha ist, dasch mar d'Chuo g'seh cha, sust verliertsch mar sicher d'Milch old tuotsch abbas Tifolsch dran erdeichu (daran etwas böses anrichten.) Und richtig, wiesch mit der Chuo über dun Platz g'fahru sind, da sy d'Hex grad vor dum Hus g'sessu. Da hei d'Hex z'ihne g'seit: «Gebe che Gott Glück z'diescher Chuo.» Da het ihr d's Wib g'antwortot: «Ja du hellischi Hex, i weiss scho wie du Glück wischost.» Und oigublicklich sy d'Chuo tod niederg'fallu. Da sy d'Lit, di das g'seh heint, g'schwind zum Pfarrherr z'Staldu g'liffu und hei die vermeinti Hexe angiklagt, dasch ne grad di schö Chuo gitötet hei. Wie nu der Pfarrherr uf du Platz zer totu Chuo cho sy, hei er dum Volch g'seit mit zornige Blicku: «Lät mar das Mensch mit Fried, schi ist kei Hex, ja wen ihr's wissu wellt, es ist besser wa ihr — und wil ihr ihm heid d'Ehr g'stohlu, so hät sus Gott zuo gla z'ewwer Straf, dass der Tifol scha plötzlich erwürgt hät. Und wenn ihr's nit glaubu wellt, so b'schouwet du Hals vanner Chuo. Und richtig hei mu um du Hals van ner Chuo, zwei brandschwarzi Strife g'seh, as weh jemand mit g'firige Armu der Chuo schich um du Hals g'wunnu (winden) hätti, um scha z'erwirggu. Und so hät der Pfarrherr das arm Mensch van der Hexustraf erlöst.

Quelle: M. Tscheinen, P. J. Ruppen, Walliser Sagen, gesammelt und herausgegeben von Sagenfreunden, Sitten 1872.
Eingelesen von der Mutabor Märchenstiftung auf www.maerchenstiftung.ch