Äis siin in enemWaald Räiber gsiin. Neemmen hed se chenne faan, und war dir dä-w-Waald isch ggangen, ischd nee mee virhachun.

Döö ischd da e Chinig gsiin; där hed es Hudelgwendli agläid und es Schlotterhutelli a-r-Rigg gnun und ischd i-w-Waald ggangen, as wen er wellti holzen. Är hed gringi Chnebelteni zsämegläsen, ischd über Stäina und Wirzi gstirfled, hed d'Chnebelteni zerbrochen und i ds Huttelli gstungged und ds Huttelli umghiid und taan wee ne Schlächta und en Nool.

D'Räiber hain im zöögseen und häin ne gfangen und i d' Hili gnun. Und das Mandelli hed Tscholleti glached, und dr Hoitman hed gsäid, fir was si dä bbrachd häigen, das siigi e Ganggel. Si chennen dän nid üüsschlaan ung Gäld fir in häischen.

Aber da ischd e-r-Räiber gsiin, där hed däm Mandelli nid rächt truwwed ung gmäind, dar siigi gschiider, wa d'Chappe schiinni, där teeji goich und chennte sa no hinder dr Hand nän.

Döö häi s' im es Girbi virha, fir na z'fecken, und ds Mandelli hed meesse träten. Bald hed's hindertsi träten und den umhi virhi, und derzöö hed's glached wee ne Tscholi und taan wee nen Halbschlächta uf enem Chibel.

D'Räiber sii-r-rätig worden, si wellen dä-l-lan gaan; mit däm siigi's hinn u vor niid und dir und dir e Tschampel. Und derna häi s' ne-l-la-l-loiffen.

Es par Tag derna sii Saldate chun, dr Chinig ischd o derbee gsiin. Si siin i d'Hili und häi d'Räiber gfangen und i Schälli taan. Derna hed dr Chinig ds Girbi gnun und hed träten, ds Redli ischd zringetum und hed gsurred, und d'Räiber häi virhagseen wee troled Widra. Aber dr Chinig hed glached, hüt chenni är eso, äs häige-m-ma drum bessred.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.