Der gräust Härätummelplatz söll der Gafarabühel gsi si. Dört hind richi Härä, schüner als Alerunä, ganz Nächtä tanzet mit Härameisterä vu Mäiland und Veneidig, diä in der Schwiz gheimi Goldouderä gwüßt hind und dermit steirich wordä sind. Mä hätne-n-au fahrendi Schüeler gseit. Mings Froufastächind hät am Morgä nouere söttägä Härägugelfuehr di wunderfinstä Damäschueli im vertrampletä Gras ufgläsä. In dä Mailinder-Chriege, wous vil Schwizer derbei ka hät, sei amoul z'Mailind ä Melser- oder Wißdannersoldat Schiltwach gftandä. Duä heigem ä Dam vumenä prächtägä Palast us si Namä grüeft und gwunggä. Wener duä nou der Wacht ufft sei in di Pallast, luägne dou ä Frauezimmer a we Milch und Bluet und ufputzt wenä Chünigi und frougnä, eb er der Gafarabühel au bchinni. Er seit des d'jou. Duä meint sie druf: "Dört hani mingi lustigi Nacht durläbt" - und heigä derbei äsou korjous agluäget, aß er Hinnehut überchu hei und wider se gnoud aß müggli ussi sei us dem Palast.
Albrecht, Erinnerungen.

Quelle: Sagen des Kantons St. Gallen, Jakob Kuoni, St. Gallen 1903, Nr. 273, S. 147

(Siehe auch Der Hexentanz auf Gafarrabühl von Jakob Kuoni)

Eingelesen von der Mutabor Märchenstiftung auf www.maerchenstiftung.ch.